الثلاثاء، 9 سبتمبر 2008

صك ملكية 1

عايز اتجوز كل واحد فالح عملوا قرشين بطلوع الروح و قرر يكمل نص دينه ( يارب النص الاولاني يفضل) المهم يروح يختار العروسة او كده الواحد مننا بيظن انه ممكن يختار عروسة بيدخل بيوت وطلع منها ويعرض نفسه و يترفض وهو مش مدرك ان العروسة هي اللي بتقرر مش هو ما اطولش عليكم
واحدة حست ان دة المرشح لتتعايش عليه قصدي تعيش معاه يبتدي مسلسل الاستيلاء علي تحويشة العمر الحلقة الاولي
احنا بنشتري راجل و الشبكة من مقام العريس و هدية يعبر بيها عن مدي تقديره ماشي ........... محل الدهب تعمل البت مش عارفة حاجة وساذجة و تبتدي بالدبله و تنقي احف دبلة ال يعني قنوعه ....... تروح الشهامة ضربة في دماغ المعلم و مختار دبلة تقيلة لان الفرق في السعر مش كتير 200- 300 جنية بس يثبت انه مش بخيل و يتكرر السيناريون علي كل قطعة وان حسبتها و لقيت الحسبة خرمت و بطلت تعمل نفسك كريم تروح العروسة مستعينة بصديق و غالبا بتكون امها ............ تقول لها كلمة السر المتفق عليها اية رايك يا ماما اختار دي و الا دي و طبعا دي التانية 3 اضعاف حجم دي الاولانية و ينتهي يوم الشبكة و الباشا دافع و مستلف من امه عشان يكمل ..............ز يا خويا افرح هو انت هتفرح كل يوم و تتكروت بكام زغروتة

و يتكرر الكلام وبشويه دلال علي حبة زعل من ماركة انا واخده علي خطري منك تلاقي نفسك دافع مهر و مجهز و اهل العروسة جايبين حلتين و كنكة علشان اهم حاجة في الجواز مزاجك و فنجان القهوة

المهم انت عارف انك قبل كتب الكتاب لازم تمضي علي القايمة ............. خد بالك القايمة و فيها كل اللي انت دفعته وجهزته

تروح ماضي..... خلاص مضيت ده بقي صك الملكيه ..... ملكية مين ملكية العروسة للعبد الجديد اللي اشترتة من سوق الرجالة مختوم علية ممنوع ملكية خاصة

و للحديث بقية



هناك 9 تعليقات:

Bobbos يقول...

ياباشا نورت التدوين

القصة جميلة .. حاسس إنى شوفت الفيلم ده قبل كدة..

كاس و الكل لازم يشرب منه...

ما فيش حد بيحرم..

كل سنة و أنت طيب..

حاول تشيل موضوع التأكيد

همس يقول...

ياسلام

اللهم اجعلو خير
دا على اساس انكم الطبقه المضحيه
والطبقه المغلوب على امرها

تصدق وانت بتحكى كانت الدمعه هتفر من عينى
ههههههههه

طبعا لازم يدفع

اللى بيجى بالساهل بيروح بالساهل

واصلا الرجاله اليومين دول ملهمش كلمه ولا امان اصلا

ويااااااما بنات قبلت بالقليل بس للاسف ما اتقدرت صح واتباعت بالقليل برضو


يعنى بلاش سلسله افلام المظلومين فى الارض



ومبروك على المدونة

ورمضااااااان كريم


وابقى شيل كلمه التاكيد بتاعت التعليق دى

ولد مصري يقول...

ماتسمعش كلام همس هيه اكيد بتهزر لكن المشكلة إنها بتعبر عن أصوات جيل كامل من عرايس المستقبل

كلامك يا دكتور مظبوط

وزي ما بوبوس قال الفيلم ده بيتكرر في كل جوازه بس الابطال بيكونوا مختلفين

ومابتفرقش مابين ابطال من العشوائيات او الطبقة الارسطقراطية في الآخر الزبون كده أو كده بيعدي الميزانية المحطوطة علشان خاطر ست الحسن والدلال .. اللي طبعا زي ما قلت بتتحول بقدرة قادر إلى شجرة الدر بعد الجواز

تحياتي لقلمك المبدع

تحياتي

على فكرة نظرا لانك مستجد في عالم التدوين تأكيد الكلمة بتتشال من الاعدادات تروح على التاب بتاع التعليق وتنزل لتحت شوية هتلاقيها موجودة كل اللي عليك تعمله تشيل العلامة في البوكس الخاص بيها وان شاء الله هتبقى زي الفل

تحياتي مرة تانية

أحــوال الهـوي يقول...

يا همس دموعك غالية علينا تقصدي اية باللي بيجي بالساهل بيروح بالساهل اللي انتوا اخدتوه واللا اللي احنا دفعناه و علي فكرة الرجالة اليومين دول و اليومين اللي فاتوا ملهمش امان خدوا بالكوا و زودوا المهور و اكسروا وسطهم بالشبكة و الجهاز و بكده يبقوا لهم امان لان مالهمش اسنان و لا لزمة

تحياتي

هبة النيــل يقول...

ياراجل حرام علييييييييييك


عموما هناك كائنات "متعايشة"

وهناك "مترممة"

فاحمد ربك على "التعايش" إذ تظل بك "حياة":)

وعموما التعايش أو "التطفل" زي ما فيه "متعايشة" هناك "متعايش" :)

شكلنا هنختلف من الأول يا فندم

جاي انت جامد على "نون النسوة"

هبة النيــل يقول...

أهو حتى شوف "همس" قالتلك ايه

( تصدق وانت بتحكى كانت الدمعه هتفر من عينى
ههههههههه

طبعا لازم يدفع

اللى بيجى بالساهل بيروح بالساهل

واصلا الرجاله اليومين دول ملهمش كلمه ولا امان اصلا

ويااااااما بنات قبلت بالقليل بس للاسف ما اتقدرت صح واتباعت بالقليل برضو)


أيوة بيتخيل الرجل في هذه الحالة انها "بايرة" مثلا علشان كدا أبوها لم يعذبه في شيء

أحــوال الهـوي يقول...

ياهبة النيل
لابد ان تكوني علي منهج واحد في وشوشة حلم كنت قمة القناعة والشفافية و تعترضى علي مكافحة المغالاة في المهور وجعل الزواج سلعة وليست شراكة عمر فاذا سلمت الفتاة نفسها و حياتها لانسان تأمنه و ترضي به كل العمر فمن الاولي عدم الافراط في و ضع الضمانات للهيمنة علي قرار الانتقام تحسبا لما قد يحدث
تعرفي ان احساس المرأة بأن مقاليد الامور بيدها يجعلها اكثر تعاسة لان قوة المرأة لابد ان تنعكس من زوج قوي وليس زوج خاضع او شاعر بالانكسار هذا معناه الجحيم
يارب تفهميني وربنا ما يجيب خلاف

هبة النيــل يقول...

أيوة يا فندم

والله نفس المنهج

نعم دون "مغالاة"

لكن أيضا ليس الرجل هذا "الكنز" الذي إن وجد

تم ابتزازه

ربنا ما يجعل فيه خلاف

بس لو فيه "مشاعر" تهون كل حاجة

هبة النيــل يقول...

وعلى فكرة للتوضيح

في وشوشة حلم معترضة على المغالاة "عموما"

المغالاة في المعيشة وفي المتطلبات الحياتية

بكل شيء

الدنيا أبسط من كدا فعلا

بس احنا اللي بنكد على روحنا