الاثنين، 22 سبتمبر، 2008

صك ملكية 3

في بداية الزواج يصبح الزوج المواطن رقم 2 في البيت و بتسأل مين رقم 1 طبعا المدام ........ لكن يحظي هذا الكائن المسمي الزوج بالاهتمام اكل الباشا لبس الاستاذ مكوة الافندي شاى و قهوة للمحترم و هكذا الي ان تحمل المدام علشان تجيب ولي العهد و حامل أختام الرجولة والفحولة ........ و لك ان تتصور ان اول شخص تكرهه المدام مين ؟؟؟ طبعا انت مش انت السبب في الفشولة و التخن وبوظت العود الكمنجاتي بتاعها و بعدين تبتدي تكره ريحتك اللي بتخليها نفسها بتغم عليها و عايزة ترجع .... لا مش ترجع اللي خدتة منك لا لا ترجع يعني ؟؟ ترجع ما تفهموها بقي و تيجي ميعاد الولادة و اول واحد يتشتم طبعا انت مش انت سبب الالم اللي هيه فيه

و لما يصل المحروس المنتظر تصبح انت المواطن رقم 4 بالبيت ايوة المواطن رقم 1 المحروس رقم 2 ام المحروس ثم البيت ثم انت لو فيه وقت و تفضل تتقهقر في الترتيب لو جاء الطفل الثاني تصبح المواطن رقم 9 اظن انت دلوقت بقيت خبير في الاولاويات رتب انت بمعرفتك الي ان تصبح الغريب في البيت لو تسأل العيال انا مين يا ولاد هيقولوا ايوه الراجل ده بنشوفوا فيالصالة عندنا ودايما بيشيل الزبالة معاه و هو نازل من البيت

الأحد، 21 سبتمبر، 2008

صك الملكية 2

دبح القطة و لانك غشيم و فاكر ان دبح القطة زي زمان الارهاب و الكباب لا خد بالك الاسلوب تطور يعني مثلا اسلوب الهاي هيل تدخل كافتيريا او فندق او مطعم و تستلملك بمصطلحات قوية طبيعي لما تكون عايز حاجة حلوة تقول اديني دستة جاتوة من ده و الشكولاتة و الابيض لا يا حبيبي تروح ماسكة منك الحوار اشي بلاك فورست علي سويس رول واسمه ايه فور سيزون علي ميلفيه الخ وانت فاتح بقكك وتتكرر في اسامي الاكلات شامبنيون علي كاميلوني حتي الشاي باه اسمه هاي تي وخلاص تم دبح القطة

الفرح .... و لانة علي العريس فلابد و لزمن يكون يليق و اهم حاجة البوفية علشان جيوش المعازيم لازم يتعشوا و الله يا حبيبي عايزين كام ديك رومي و المحاشي و اللحوم الباردة و البوفتيك و اللازانيات و المكرونات علي الرز ابو خلطه و طاسة الخضة ما تنساش الزفة بتاع 20-30 واد من اللي بتقردنوا اهـ نسيت الجاتوهات التورت عايزة تورتة العروسة سبع تدوار و ايه تاني المكسرات مكسرات اية اطباق ياحبيبي تسلي المعازين قبل العشا بس اكتب عندك 10 ك لوز و زيهم فزدق علي شوىه كاجو بتاع 5 خليهم 10 ك الشوكلاته اما في فرح بنت خالتي كانوا جايبين نوع شوكلاتة ب 120 جنية الكيلو .......... لييييييييه ..... يعني هيه احسن مني و تلاقي تكشيرة اترسمت علي وشها و هي بتقولك بلاش مش عايزة اتقل عليك و لو اني نفسي فيها تروح و تروح مبتسمه بدلال و قايله انا ما يخلصنيش زعلك تروح جنابك ناخخ زي الجدع و حالف وجايب وكاعع وانت زي ال.............؟؟؟؟ الباشا طبعا


وللحديث بقية

الثلاثاء، 9 سبتمبر، 2008

صك ملكية 1

عايز اتجوز كل واحد فالح عملوا قرشين بطلوع الروح و قرر يكمل نص دينه ( يارب النص الاولاني يفضل) المهم يروح يختار العروسة او كده الواحد مننا بيظن انه ممكن يختار عروسة بيدخل بيوت وطلع منها ويعرض نفسه و يترفض وهو مش مدرك ان العروسة هي اللي بتقرر مش هو ما اطولش عليكم
واحدة حست ان دة المرشح لتتعايش عليه قصدي تعيش معاه يبتدي مسلسل الاستيلاء علي تحويشة العمر الحلقة الاولي
احنا بنشتري راجل و الشبكة من مقام العريس و هدية يعبر بيها عن مدي تقديره ماشي ........... محل الدهب تعمل البت مش عارفة حاجة وساذجة و تبتدي بالدبله و تنقي احف دبلة ال يعني قنوعه ....... تروح الشهامة ضربة في دماغ المعلم و مختار دبلة تقيلة لان الفرق في السعر مش كتير 200- 300 جنية بس يثبت انه مش بخيل و يتكرر السيناريون علي كل قطعة وان حسبتها و لقيت الحسبة خرمت و بطلت تعمل نفسك كريم تروح العروسة مستعينة بصديق و غالبا بتكون امها ............ تقول لها كلمة السر المتفق عليها اية رايك يا ماما اختار دي و الا دي و طبعا دي التانية 3 اضعاف حجم دي الاولانية و ينتهي يوم الشبكة و الباشا دافع و مستلف من امه عشان يكمل ..............ز يا خويا افرح هو انت هتفرح كل يوم و تتكروت بكام زغروتة

و يتكرر الكلام وبشويه دلال علي حبة زعل من ماركة انا واخده علي خطري منك تلاقي نفسك دافع مهر و مجهز و اهل العروسة جايبين حلتين و كنكة علشان اهم حاجة في الجواز مزاجك و فنجان القهوة

المهم انت عارف انك قبل كتب الكتاب لازم تمضي علي القايمة ............. خد بالك القايمة و فيها كل اللي انت دفعته وجهزته

تروح ماضي..... خلاص مضيت ده بقي صك الملكيه ..... ملكية مين ملكية العروسة للعبد الجديد اللي اشترتة من سوق الرجالة مختوم علية ممنوع ملكية خاصة

و للحديث بقية



الاثنين، 8 سبتمبر، 2008

لاني عاشق للحياة و المتعة عندي السفر
طاير بخيال وجناح وكلمة الـســـر بشـــــر
لو كانوا زي السحاب او كانوا زى الشجر
او يبقوا مثل الصقور او صلب مثل الحجر