الأربعاء، 22 أكتوبر 2008

الحصان الابيض



ان حلم كل فتاة في الماضي ان ياتيها الفارس الذي يمتطي حصانا ابيضا و يخطفها

فهل مازال نفس الحلم يراود فتاة القرن الحالي ؟

اظن الوضع يختلف يعني لو استبدلنا الحصان بسيارة بيضاء بلاش لادا او 128 خليها بيضاء فاخرة و الفارس شاب وسيم يرتدي بدلة بيضاء يمكن يكون اقرب للواقع الان

بس الفارس يعني الشجاعة و الاقدام .....اذا شاب وسيم غني فالشجاعة الان هي الاقدام علي الزواج و دي قمة الشجاعة و ايضا التضحية بصرف الاموال

و بما ان كل تلك المواصفات قد تتوفر في عدد قليل فلا بد ان يكون من عيلة غنية لتكون الشجاعة و الاقدام و المجازفة هي فروسية في مواجهة السيد الوالد ليطلب شقة تمليك في احسن مكان

فهل حلم فتاة القرن شاب وسيم (شرط قابل للتفاوض) غني يملك سيارة فخمة و ناقص ايه ؟ ياريت تكون امه ميته علشان مش ناقصين حموات و لو كان حيلة ابوة نبقي ضمنا الميراث .......فهل دي شروط تعجيزية ؟؟

دلوقت تطلع واحده تقول المهم هو انه يكون بيحبني ويخاف عليا........... ونعيش في ستر يووووه بنقول حلم حتي الحلم فيه ناس فأرية(من الفقر)

هناك 17 تعليقًا:

كـــيــــــــارا يقول...

تؤتؤتؤتؤتؤؤتؤ

الحلم متغيرش علي الاقل بالنسبالي انا

لسه زي ماهو في احلامي وبحلم بانه يتجسد في صوره انسان

اما الناحيه الماديه والله مافارقه معايا خالص المهم يكون فيه الصفات اللي بحلم بيها

أحــوال الهـوي يقول...

كيار

ابنتي العزيزة
دعيت لك ربنا يرزقك باسطبل خيل بس لقيت استاد مليان عرسان افضل و نقي اللي يناسب رومانسيتك

تحياتي

كـــيــــــــارا يقول...

استاد بحاله

انا ميملاش قلبي وعيني الا واحد بس

ادعيلي يتجسد في انسان بس

وميرسي لدعواتك الحلوه :)

همس يقول...

انا كنت ناويه اضرب بؤين كلام

بس لما لقيتك بتقول حلم وفقريه

قلت هو من ناحيه الفقر ماسكنا اه

بس انا قررت ابطل حلم ولو حلمت احلم بحاجه قابله للتحقيق

وكلامك دا يا خويا غير قابل


على رايك فقريه

ال حصان ابيض ال

تعرف انا كنت زمااااااااان بتمنى اعيش فى فتره العصور الوسطى فى اوربا

كنت بحس ان حياتهم كلها عباره عن اساطير حتى فى حكايه الحصان الابيض

تؤتؤتؤ
اللهم اجعلو خير

حلمك حلو بالنيابه عننا

ههههههههههههههههههههه


شكرا يا استاذنا

هبة النيــل يقول...

ههههههههههههههههه

كان الحلم بصراحة يا دكتور مش عربية

لاء

"موتوسيكل" بس مش صيني طبعا

موتوسيكل كدا أحدث موديل

وياخدني ويطير فعلا

لطيفة الحصان الابيض دي

ياريت بصراحة بس الموتوسيكل أحلى :)

أحــوال الهـوي يقول...

كيارا
ابنتي في مثل عمرك بنفس مواصفاتك تقريبا رومانسية و خجولة و رغاية تضحك و تخلي دنيتي سعيدة و بتزعل بدون سبب و تروق لو قلت لها دعابة بايخة

ربنا يرزقك بمن يستحقك و يفهمك و يسعدك عن قريب يا رب العالمين

تحياتي

أحــوال الهـوي يقول...

همس
انا مش قد البؤين بتوعك
من حق كل انسان يحلم و يحب حلمه و يكون طموح و ايضا لديه قناعة بما بين يديه

وبمناسبة العصور الوسطي كانت لغة القوة و القهر هي السائدة يعني مش بس روميو و جوليت و البلاط الملكي و روبين هود
و في الآخر رجعنا تاني للحصان الابيض و فارس يندبح علشان جنابك و يفوز بقلبك

تحياتي

أحــوال الهـوي يقول...

هبة النيل
فينك من زمان
الموتسيكل في مصر و سيلة مواصلات لبعض البرجوازين محدودى الدخل في الصين لشعب و الحكومة
في امريكا للهيبي و مجموعات الفانكي
لكن اظن الموتيسكل اللي انت تقصديه بتاع جون ترافولتا او روبرت دي نيرو او دي كابيروا او اسمه ليه ده بتاع ميشن امبوسيبل
يعني من اللي تمنه اغلي من عربيه مرسيدس او بورش

تحياتي

شمس النهار يقول...

الحلم بيكون جميل
يتحقق مايتحققش ده في علم الغيب
اما الفارس في الحلم ده خيال وكل واحدوخياله عايزاه اشقر اسمر اقرع كل واحده وزوقها
اما فارس الحقيقه
محتاج فارسه زيه
يعني
واحده تضحي وتقف جنب الفرس ده وترضي بقليله
ترضي تتجوز بالأساسيات فقط
والاساسيات مش طبعا الدش وشر
والميكروويف
ويبنوا بعض ببعض ومع بعض
ويرضوا بماقسم الله لهم

أحــوال الهـوي يقول...

شمس النهار
الحلم الجميل سعادة و رضا حتي ولو لم يتحقق سلام للنفس و راحة للقلب

دعونا نحلم بسندريلا و الفارس
بشرط الا يقف الحلم عائق في حياتنا

تحياتي

شمس النهار يقول...

احلموا لنتم زي ماانتوا عايزين في سني ده احلامي اتغيرت خالص
عشان اتجوزت الفارس من 26سنه
احلامي دلوقتي مش الفارس احلامي لبنات هذا الفرس وبناتي
مدونتك جميله بحاول اقراها كلها بس مشغوله اليومين دول هحاول اخلصها قريب

أحــوال الهـوي يقول...

شمس النهار
ربنا يبارك لك و لفارسك و ايضا ان يهب لبناتك ثمرة احلامهن السعيدة و يرزقهن فرسان يحملوا لهن العز و السعادة في الدنيا و المرافقة في جنان الخلد

اعتقد ان ابنتي في مثل عمر بناتك رغم ان عمري 150 سنة

تحياتي

DR.HAMAS يقول...

البنت الصح


اللى يكون فارس أحلامها شخص متدين هيقدر يصونها




عصر الحصان و العربية المفروض ينتهى





د.حماس

أحــوال الهـوي يقول...

د.حماس
اولا شرفتني بتعليقك و زيارتك
التدين و تقوي الله صفة لابد ان ترغبها كل بنت و ايضا كل اسرة
و احلامنا نتاج هوي انفسنا تسرنا و تطيب ايامنا و الزواج غالبا ما ياتي مختلفا عن ما نتمني اذا و جدنا في عالم الواقع من يحمل ملامح امانينا

تحياتي

dina يقول...

بسم الله
طب ليه بنتكلم عن البنت بالماديه دى فى تفكيرها
على فكره البنت نفسها مش عاوزه الا حاجات بسيطه يعنى البنات الكويسين
لكن فى حاجات بتاثر على تفكيرها من بره
زى الام والاب والظروف وحاجات كتير
لكن الحلم
لازال الحلم بالفارس الشجاع على الحصان الابيض

أحــوال الهـوي يقول...

ابنتي دينا

لا نتكلم بمادية نتكلم عن احلام فماذا لو كانت الاحلام بسيطة و لاتتحقق ؟؟؟

الاهل يرغبون في حياة افضل لابناءهم و هذا حقهم لكن بدون مغالاة
و فقك الله لفارس يصونك و يخطفك الي عالم السعاده و الهناء

تحياتي

Beram ElMasry يقول...

اخى . a7wal el Hawa
السلام عليكم
صدقت (اتفرج ياسلام ) صندوق العجب ، غير انى ارمى الى اعمال الحواة فى التضليل ، كاختصار حرب اكتوبر فى ضربة جوية كما قلت فى مقالك ، انه الاعلام الفج كما فعل التلفزيون وعرض جمال مبارك يوزع شقق مع خلفية من الزغاريد وربنا يخليك ياريس ، مع انه لاوزير الاسكان ولا ابن الملك
اعلام وقح وبلطجة دعائية
اجعلنى صديق لك تكمل سعادتى